فتره صمت طويله انظر فيها لكتاب اخضر اللون غالبا عنونه كيف تحضر سمادا طبيعيا
انظر للكاميرات : من انتم ,, من انتم
واحد يقولي بصوت مش عالي قوي : دول الناس اللي منتظره كلامك
اه ..نعم .. اقترح تسريح امن الدوله ومحدش يفهمني غلط من كلمه تسريح دي لان معانا مش تسريح يعني شعرهم لا تسريح يعني نسرح الموظفين فيه للشارع واقتراحي اننا نسرح الناس دي عشان يكونوا وسط الشعب ويكون شغلهم علي ميه بيضا ولا يعملوا تحريات ولا يمشوا مخبرين ورا حد يبقي كل الناس ادام عنيهم كده
بالصلاه ع النبي كده ميدان التحرير ده هاننقله خالص من المنطقه دي عشان لو اي حد ليه شوق يتظاهر يروح يتظاهر براحته وما يعملش زحمه ف وسط البلد وحاليا عندي مجموعه من الخبراء الاجانب بيدرسوا احسن مكان ننقل فيه الميدان والاختيار الان بين مكانين الاول الكيلو 280 طريق اسكندريه الصحراوي ( موجود ده ؟ ) او المنطقه اللي بعد وادي النطرون بشويه وما تخافوش عشان محدش يقول انت مش عايزنا نتظاهر انا هاخصص مواصلات عامه تروح التحرير وها يبقي الموقف بتاعها ف العتبه وف رمسيس عادي خالص والمواصلات دي مدعوقه قصدي مدعومه من الدوله ودي هاتكلف الدوله كتير اوي مليارات يعني بس عشان خاطر الشعب ينبسط
اما بقي ارض الميدان الحاليه فقررنا تدخل تقسيم مباني وهانبني عليها مدينه جديده نسميها مدينه 25 يناير ولو الشباب الحلو ده زعلان علي الدم والعرق والحاجات اللي ضاعت منه في الميدان هاجيب لهم بندوزرات ,, عارفينها من ام شوكه دي تشيل لهم الاسفلت وتوديه الميدان الجديد .
بالنسبه للوزاره اللي تعبتوا قلبونا عشانها وكل شويه مش عاجبكم الوزير الفلاني ولا رئيس الوزراء العلاني خلاص قررنا الغاء وزاره الاعلام ودمجها مع وزاره الداخليه عشان يبقي الاعلام منه للداخليه طوالي
الغاء وزاره الشباب والرياضه وجعلها وزاره شباب بس عشان نجبر الشعب كله انه يكون شباب ولان الشباب هو اللي عمل الثوره ومافيش مكان لاي حد فوق سن التسعين عندنا مع الاخذ في الاعتبار ان الرياضه سوف يتم دمجها مع وزاره المواصلات حتي يستطيع الجميع الجري كل صباح للحاق بالاتوبيسات والمحافظه علي شبابهم الدائم ورشاقتهم
بالنسبه لمواد الدستور وتغيره عشان قدم اوي قررنا نحصر كل الدساتير اللي مرت علي مصر من اول ما قالوا يالا بينا نعمل دستور ويا اما ندمجهم كلهم مع بعض ونطبقهم كلهم علي البلد مره واحده يا اما نطبق كل دستور فتره من فترات رئاستي للبلد بس حد ممكن يقولي ان فيه تعارض في بعض المواد وبعضها وما ينفعش كده ساعتها هاقوله المواد اللي فيها تعارض يا سيدي نبقي نمشي كل ماده اسبوع ولا حاجه واهي تجربه لحد ما نلاقي احسن دستور ونطبقه علي طول
بالنسبه بقي لفتره الرئاسه فانا باقولكم من دلوقتي مش هاجدد هانخلي كل رئيس ليه فتره واحده بس ومالوش الحق انه يترشح مره تانيه ولا انه يورث حد من اقاربه لسابع جد والانتخابات هاتكون نزيهه وهانجيب حكام اجانب كمان يحكموا ما بينا
بالنسبه بقي لسن المرشح للرئاسه والناس الي بتقول مش اكثر من 50 سنه اقولكم انتوا بتحلموا لما يجيي واحد عنده 50 سنه يمسك البلد يبقي ها يعيش كمان علي الاقل 30 سنه كمان فوق قلوبكم – ماهي الفلوس بتطول العمر وبتدي الصحه – لكن ا لمفروض ان الرئيس يكون فوق الثمانين عشان يادوب يمسك سنتين تلاته وبالسلامه ونشوف غيره طبعا الكلام ده مش معناه ان الرئاسه هاترجع تاني مدي الحياه .. لا بس محدش ضامن ممكن يحصل ثوره كمان كام يوم ولا كام سنه ترجع كل حاجه زي الاول
وفي نهايه كلمتي ايها الاخوه المواطنون اتمني لكم ثوره سعيده والي اللقاء في الخطاب القادم والسلام عليكم
الله – الرئيس – الوطن
الأحد أبريل 10, 2011 5:34 am