فيه حكاية بتقول إيه.. بتقول إن كان فيه سلطان. والسلطان كان بيقعد كل أسبوع في مجلسشه وبييجي التجار والأعيان والوجهاء والوزراء وكل واحد يتكلم والسلطان بيقول توجيهات ويصدر أوامر.. واللي عنده حاجة بيروح المجلس ويقولها للسلطان.
وفيه واحد ناصح زي بتوع الأيام دي.. أخد هدايا قيمة.. دهب وياقوت وألماظ وأهداها للسلطان وطلب منه طلب واحد بسيط.. وهو أن السلطان كل ما يقعد في المجلس ينده عليه قدام الناس ويروح لغاية عنده يوشوش في ودنه والسلطان ما يقولش حاجة.. بس يهز رأسه ولو عاوز كمان يشتمه يميل عليه ويشتمه من غير ما حد يسمع.
والسلطان قال زي بعضه.. وكل ما يقعد في المجلس يشاور لصاحبنا.. والأخير يقوم بسرعة ويروح يهمس في ودن السلطان كام كلمة.. والسلطان يبتسم.. وخلاص.
والناس قالت ده أكيد راجل مهم.. والسلطان بيسمع له.. وأكيد بينقل للسلطان أخبار الناس أو بيدي السلطان نصيحة.
ويوم ورا يوم.. الهدايا بدل ما كانت بتروح للسلطان بقت بتروح لصاحبنا.. ده راجل خطير ولازم الناس تخطب وده وتتقي شره.. واللي دفعه صاحبنا للسلطان استرده من الناس أضعاف أضعاف.. وبقي كمان أغني من السلطان ويمكن أهم عند الناس.
وحكاية الراجل اللي ضحك علي السلطان دي زي حكاية الراجل اللي كان ورا الرئيس المخلوع حسني مبارك واللي اسمه زكريا عزمي.
فزكريا عزمي مش بس كان بيوشوش في ودن الرئيس ده كان أهم عند بعض الناس من الرئيس نفسه ده هو كان اللي بيوصل للرئيس كل حاجة.. واللي يخليه يوقع علي بياض كمان.. ولما الرئيس كان بيسافر ويتعالج كان هوه الكل في الكل.. الأوراق معاه والأختام كمان.. يعني الهدايا والنفوذ عنده والكل قدامه بيتمنوا إشارة من إيديه.. أو تليفون من تليفوناته.
ومش غريب أن يكون عنده عشرة مليارات جنيه بس.. وإيه يعني.. ده لو كان عاوز كان بقي عنده مليارات المليارات.. بس هوه استكفي بعشرة مليارات بس علشان لا عنده ولد ولا بنت يورثوه.. والعشرة مليارات كفاية علشان تأمين مستقبله لو كان الحكم مش زي ما همه عاوزين وجه الابن يورث الأب ويحكمنا.. ورجالات أبوه يروحوا يستريحوا ويستمتعوا بالكنوز اللي معاهم.
واللي يضحك إنه كان بيتكلم عن الفساد.. وهو صاحب العبارة الشهيرة لما وقف في مجلس الشعب وقال إن الفساد في المحليات وصل للركب.. وجه كتبة النظام بتوع صحافة الهشك بشك وهللوا للتصريح وقالوا يا سلام.. شوف الراجل النضيف اللي خايف علي البلد. شوف الديمقراطية.. أهوه الراجل من أقطاب النظام وبيهاجم الفساد.. شوفوا الحلاوة.. شوفوا الطهارة.. شوفوا النظام اللي بينقد نفسه علشان يطهر نفسه.
وقال إيه يا سيدي.. الفساد في المحليات وصل للركب.. أمال الفساد في النظام كان وصل لإيه.. للنخاع ولا للقلب ولا للدماغ.. ده كان كله فساد في فساد.. واللي مسرقش في النظام كان بيبقي عبيط وأهبل.. دا المليارات كانت بتتحدف يمين وشمال. وكل واحد منهم طلع معاه بدل المليار عشرة.. وكل واحد عنده بدل القصر برضه عشرة.. وكمان عشرة علشان الأنجال وزوجاتهم وأحفادهم.. وأحفاد أحفادهم..!
واحنا علي كل حال بنسمع كتير عن المليارات دي.. وعندنا سؤال واحد.. يا تري هاترجع ولا لأ.. يا تري ما أخذ بالباطل هايرجع بالقانون.. ولا عمر اللي راح ما هايرجع تاني.
ونقول رأينا.. وأمرنا لله.. احنا ما يهمناش يتحبسوا كام سنة.. ولا الأحكام هاتكون إيه.. احنا يهمنا الفلوس ترجع. الشعب يريد فلوسه اللي اتسرقت.. المليارات دي لازم ترجع.. ولو رجعوها إحنا مستعدين نسامح. ومستعدين نكتب ونقول خليهم يعيشوا اللي باقي من عمرهم في سلام.. ومستعدين ننسي اللي فات. ومستعدين ما نتكلمش عنهم تاني.. بس يرجعوا اللي سرقوه.. واللي أخدوه هدايا من أملاك الشعب.. أراضي أو فلوس.. ويكفروا عن ذنوبهم بأن الشعب يعيش.. عاوزين المليارات دي علشان نبني بيها بيوت آدمية بدل العشوائيات.
عاوزينها علشان عمال اليومية اللي اتشردوا وهايتحولوا لبلطجية وقطاع طرق يلاقوا ياكلوا ويعيشوا ويشتغلوا عاوزينها علشان بلدنا تبقي أمان والفساد ينزل تحت الركب.. عاوزينها علشان ننسي اللي فات ونقول اللي فات مات.. ونبدأ من جديد.. عاوزينها علشان خلاص مبقاش فيه سلطان ولا حد هايقف ورا السلطان ولا احنا كمان هانقبل أن يكون فيه تاني عندنا سلطان..!!
** ملحوظة أخيرة:
يقولون إن هالة سرحان ستعود لتنتقم.. ويمكن كمان تطلع من مفجري الثورة..!!
الأربعاء مايو 04, 2011 1:38 am